日本福岡 - 原鶴溫泉帕連斯酒店 (Hotel Parens Onoya)

地點其實位於久留米附近，一個寧靜小區，入住原鶴溫泉帕連斯酒店 (Hotel Parens Onoya)。一入到房，見到一般酒店床同廁所之外，仲有一個日式和室用餐位置，感覺好超值。今次係自駕遊，酒店門口就有免費車位，非常方便。

酒店附近開車都方便，只係到了晚上小路比較黑，亦有路比較窄。酒店周邊不遠有停車位，可以在附近餐廳用餐，亦有其他店舖可以逛逛。

酒店附近開車幾分鐘有一間すき家(Sukiya)

溫泉入口附近花園都好有氣氛

房內廁所同浴缸「乾濕分離」，有基本用品。

房內和室部分的茶具排列整齊用心

日本大阪 - 天王寺動物園

 全名係大阪市立動物園，已經有超過100年歷史，座落天王寺區，地點非常方便易去，JR天王寺站同地鐵Metro動物園前站都可直達，其中地鐵Metro動物園前站行去面向新世界區入口比較近，大阪周遊咭免費入場。

入到去發現動物數量比想像中多，獅子老虎都有，當然仲有好多小動物。不過呢...老實講，真係好舊，日久失收。可能因為真係太近市區，無論自然環境空氣都比較局促，見到好多大型動物都好似好攰、精神好差。

不過咁，旅遊本身唔係就係去睇吓唔同地方嘅風貌? 

經理Tips: 自由行好多時靠鐵路去唔同地方觀光，搞清楚出入口位置可以避免行冤枉路花時間。

日本京都 - 清水寺 紅葉片片

 講到清水寺，可以話係京都必去行程。除咗寺廟本身建築值得付費入場睇之外，周邊商店街亦不容錯失。今次上清水寺遇著大殿裝修，但唔緊要，因為目的其實係睇紅葉。講到睇紅葉，最緊要留意當地預測變紅時間表，唔同地方時間都唔同，可以撞正最紅時候睇到，除咗安排，都講運氣 (廢話)。

經理Tips : 時間表隨意搜尋打幾個字(例如：紅葉時間)就搵到，留意有年份，唔好睇錯舊年時間。

色彩斑斕

遠眺京都市內景色

大殿維修，主要拍「仁王門」為主

日本大阪 - 大阪城

去大阪必到景點一定要數大阪城，係大阪象徵。天守閣共8層，大部份樓層展示大阪城歷史同文物，頂層可飽覽大阪城的都市美景。頭幾層有升降機可達，遊人多的時候要排隊。一般建議玩法係上去就搭升降機，然後行返落去逐層睇。

大阪城下面公園可以俾大家休息一下，同時都有靚景可以打咭，沿著入口左面落斜路下面都好拍。我就搵到個私家位，可以一次過影到紅葉同埋城堡，大家都可以參考下。再行落去仲可以搵到觀光船搭，由水上角度欣賞城池。

經理Tips : 大阪周遊咭 (Osaka Amazing Pass) 已包天守閣入場費，重點係唔駛再排隊買票，慳返唔少時間。

這角度是我私人推薦，行落城前公園，落斜路後有一棵好靚紅葉樹。

雖然隔住鐵網圍欄，都可以拍到相當開揚景色。

天朗氣清，拍大阪城最襯色。

日本關西臨空城 - HATAGO INN Kansai Airport 文青系酒店

入住時是2019年，當時在大阪關西機場臨空城(Rinku Town)新開一間有室內溫泉設施的酒店。由臨空城車站行過去有少少遠，但都叫做行到唔太辛苦 (官網聲稱7分鐘行到)。

Lobby走文青路線，海量漫畫書超過10,000本任睇 (邊個會去旅行花時間睇好多漫畫@_@)，彷彿身處圖書館，又似機場候機室。

溫泉設施在室內，一眼見晒，但勝在新凈，都有空間感，沖身位置好闊落。

臨走時落雨，職員貼心借了雨傘 (不用還)，感謝！

酒店Lobby給人舒適感覺，文青系主題太有Feel。

大門設計非常Warm and Welcoming。